ಚುರುಮುರಿ (Churumuri)

ಸಂಜೆ ಕಾಫಿ ಜೊತೆಗೆ ನನ್ನ ಅಚ್ಚುಮೆಚ್ಚಿನ ತಿಂಡಿ ಚುರುಮುರಿ. ಕರಾವಳಿಯ ಮಳೆಗೆ ಸರಿಯಾದ ಹೊಂದಾಣಿಕೆ. ಇದನ್ನು ತಯಾರಿಸುವುದು ಕೂಡ ಬಹಳ ಸುಲಭ. ನಾನು ತಯಾರಿಸುವ ವಿಧಾನವನ್ನು ಇಲ್ಲಿ ಬರೆದಿದ್ದೇನೆ.

ಬೇಕಾಗುವ ಸಾಮಾಗ್ರಿಗಳು:

೧) ೨ ಟೊಮ್ಯಾಟೋ (ಗಾತ್ರ ದೊಡ್ಡದಾಗಿದ್ದಾರೆ ಒಂದು ಸಾಕು)
೨) ೨ ಈರುಳ್ಳಿ
೩) ಮೆಣಸಿನ ಪುಡಿ
೪) ನಿಂಬೆಹಣ್ಣು - ಅರ್ಧಸಾಕು
೫) ತೆಂಗಿನಎಣ್ಣೆ
೬) ಸ್ವಲ್ಪ ಮಿಕ್ಶರ್
೫) ಸ್ವಲ್ಪ ತುರಿದ ಕ್ಯಾರೆಟ್
೬) ಮಂಡಕ್ಕಿ.

ತಯಾರಿಸುವ ವಿಧಾನ:

ಮೊದಲು ಟೊಮ್ಯಾಟೋ ಮತ್ತು ಈರುಳ್ಳಿಯನ್ನು ಸಣ್ಣಗೆ ತುಂಡರಿಸಬೇಕು. ಸಣ್ಣ ಪಾತ್ರೆಯಲ್ಲಿ ೪ ಚಮಚ ತೆಂಗಿನ ಎಣ್ಣೆಯನ್ನು ಸುರಿಯಿರಿ. ಅದಕ್ಕೆ ರುಚಿಗೆ ಬೇಕಾದಷ್ಟು ಉಪ್ಪು ಮತ್ತು ಮೆಣಸಿನ ಪುಡಿ ಸೇರಿಸಿ. ನಂತರ ತುಂಡರಿಸಿದ ಟೊಮ್ಯಾಟೋ, ತುರಿದ ಕ್ಯಾರೆಟ್ ಮತ್ತು ಈರುಳ್ಳಿಯನ್ನು ಸೇರಿಸಿ. ಮಿಶ್ರಣವನ್ನು ಚೆನ್ನಾಗಿ ಕಲಸಿ ನಂತರ ಅದಕ್ಕೆ ನಿಂಬೆಹಣ್ಣು ರಸ ಹಿಂಡಿ.  ಈಗ ಬೇಕಾದಷ್ಟು ಮಂಡಕ್ಕಿ ಸೇರಿಸಿ ಚೆನ್ನಾಗಿ ಕಲಸಿ. ಅದಕ್ಕೆ ಸ್ವಲ್ಪ ಮಿಕ್ಶರ್ ಸೇರಿಸಿ ಮತ್ತೆ ಕಲಸಿ. ರುಚಿಯಾದ ಚುರುಮುರಿ ತಯಾರು :-).

ತಯಾರಾದ ತಕ್ಷಣವೇ ತಿನ್ನಿ ಇಲ್ಲವಾದಲ್ಲಿ ಮಂಡಕ್ಕಿ ಮೆದುವಾಗುತ್ತದೆ. ಆದಷ್ಟು ಕೊನೆಗೆ ಮಂಡಕ್ಕಿ ಸೇರಿಸಿ. ಮೆಣಸಿನ ಪುಡಿ ಮತ್ತು ತರಕಾರಿ ನಿಮಗೆ ಬೆಕಾಗುವಷ್ಟು ಸೇರಿಸಿ. ಇಲ್ಲಿ ನಾನು ಬರೆದಿದ್ದು ಒಬ್ಬರಿಗೆ ಬೇಕಾಗುವಷ್ಟು ಮಾತ್ರ. ನಿಮ್ಮ ಬೇಡಿಕೆಗೆ ತಕ್ಕಂತೆ ಬದಲಾಯಿಸಿ. ಚುರುಮುರಿಗೆ ತುರಿದ ಮಾವಿನಕಾಯಿ ಮತ್ತು ಸೌತೆಕಾಯಿ ಕೂಡ ಸೇರಿಸಬಹುದು. ಸೌತೆಕಾಯಿಯಲ್ಲಿ ನೀರಿನ ಅಂಶ ಇರುವುದರಿಂದ ನಾನು ಹೆಚ್ಚಾಗಿ ಬಳಸುವುದಿಲ್ಲ.